忠孝東路 大戰 新宿三丁目

又出發喇!今次去台北!
12月去的東京及台北,都係我鍾意去的地方。兩個禮拜前的東京之行,玩得、買得盡興,呢兩個禮拜又做到暈,一做到暈暈地,就好掛住個東京,特別掛住新宿東口的三丁目。
台北又係一個我好鍾意的地方,去到我都唔記得自己去過幾多次。好多人問我,台北究竟有乜好做。其實我都答唔出,但就東逛逛、西逛逛,野又好食,最鍾意飲水果茶,三幾日又過得好開心。感覺係個人的,正如我不大鍾意曼谷一樣。
台北我一定去忠孝東路,我去左n次,最鍾意忠孝東路四段,即係神旺大飯店後面的特色小食店,求其入一間,不論食晚飯或high tea,都十分舒服,呢個係我心水選擇。而咁多誠品中,除在信義旗鑑店外,我最鍾意東區的敦化南路的誠品。今次破天荒唔係住神旺,都要轉變下,餐餐神旺,由亞太住到神旺。
拿,個人心水,就係落機,先去7-11,買本Taipei Walker,我通常都係入面找下有乜好食的。佢似似地新假期,有食同玩介紹,如果唔使去九份,就買本發掘下新地方。
淡水,我幾年前無理頭中左去,個時仲未好似依家咁hit,呢個地方好俾到我驚喜,一定好過去九份。九份其實真係無乜好去!

去東京的朋友,嘩,1月份大減價呢!

記住隨身帶備護照,準備退稅。有得退稅的舖頭,$10,000已有得退,七百蚊港紙度,同個friends加埋一齊,唔難退到。佢退完稅,會釘張紙係本passport度。上次喪買東京,我同金山阿毛本特區護照,都被釘得厚厚,都慳到錢架。5%不多,慳餐食都好呀!
買野方面,每次我都迷失COMME CA,衫、袋、文具,例不虛發。另外,今次買的Nikon DC,比香港比三分一,由於電壓係110V-240V,係香港換過插頭就得,抵買!我估唔到有價講,但唔講價,記住係Sakura 填張form,羅張point card,買件大item,d分已可以買d Accessories,如相機袋。個人心水仲有買錶,G-Shock,Citizen、Casio,款新,價錢平。一年前買的G-Shock同今次買的Citizen,香港可以無呢隻款,又或者係貴好多。當然,最好買新款,除非舊款減價減得好勁。
至於化裝品,香港有的,其實價錢差唔多,要買,就買香港無的。你知,好野,日本仔係唔會出口的。心水選擇係Kanebo的Freshel系列,抵用,好用。常盤貴子賣廣告個條line,我次次都買。Shisido的ELIXIR,亦好好用。

記住一到步,係便利店買張Suica卡,佢係東京八達通。搭車用得,去便利店都用得。你知喇,買到一抽二lun,根本無手再去買飛。Suica按金$500,可以走個時refund。我就無refund,下次費時買過。我以前係成田機場,次次坐機場巴士,今次改坐Skyliner,由成田直去上野,又舒服,又唔使塞車,平$1000。如果走個時多野,我地就搭的士去上野再轉車,錢係其次,要知道,去成田成日塞車,最高紀錄,我塞過2粒鐘,坐Skyliner,就準時57分鐘,由上野去成田!
行李
超重,去日本常見。我一定先將所有包裝掉晒,亦帶備旅行袋,個行李箱放唔晒,就將D衫放落個旅行袋度Handcarry。千奇唔好將化裝品Handcarry,多得個乞人憎美國,為防恐佈襲擊,不能帶超過100ML的Liquid上機。所有化裝品,記住寄鎗呀!

記得98年同唯一朋友去東京,唔識找,好多時食貴野,又貴,又麻麻好食。東京又好,大板又好,strongly recommend去食個d細細間,坐得十個人度的小店,好味,又抵食。$1,000一位,已經係好過消費。我特別鍾意食拉面同日式curry食,通常最貴不超過$800。係車站裡面,或近車站的係好好食。唔識日文,唔緊要,指或者靠估。

我今次,哈哈,叻左少少,好簡單的日語,講到DD,最多照讀平假名。睇到OO地的。
但我個人覺得,身體語言加漢字係最好,東京人好少少,多見外國人,東京以外,最好少用英文,因為日本人會驚。多數時候,我索性講中文加漢字加身體語言。最好帶備紙、筆及計數機,計數機係羅黎襟個價錢出黎,你羅俾佢,佢一定知你做乜。
其實,旅行就係咁,呢D係樂趣,去法國咪又係咁!法國人仲寸,你唔講法文唔理你。

去完新宿三丁目,又未去忠孝東路之前,我今晚先去軒尼詩道飲先!

Dec 24, 2007 5:03 am

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s