去年到新加坡NAC發生了一段小插曲，令我有一番體會。

話說第三天的conference，在下午兩點的時候，大會突然叫會場幾千人離開，然後需要重新排隊入場，但無講乜野原因，頭兩日都無試過係咁。場內的新加坡人，唔問原因，乖乖離開會場。館內工作人員以"命令語氣"叫我地離場，我地一行廿多個香港人回答，唔係唔合作，但要問清楚點解要離場，再入場後安排係點。工作人員面部無表情，亦無回應，只係不停叫我地離場，一副:"叫你走就走喇，問咁多"。由於工作人員仍然係無回應。我地當然無離開座位，因為我地要知點解要走。工作人員最後沒有再理會我地。

最歎為觀止的係，由於離場並無事先通知，有好多現場觀眾將隨身物留係會場，然後出在去食飯。工作人員將所有隨身物掃走，如垃圾咁放係hall的兩邊。新加坡人再入場後，就係堆垃圾度，找番自己隨身物，然後乖乖找個位坐底，無發脾氣、無投訴。香港發生咁的事? 明日等上蘋果A1喇。

個下好大感覺，香港人成長和生活在自由中，包括言論、行為同思想! 所以我地會問"點解"? 我地要明白事情，唔鍾意盲從。新加坡好喜歡找香港黎比較，其實無乜好比，一個係嚴師下的乖學生，一個養母下的野孩子。